المذاكرة في شهر رمضان
احبائي الشباب ومتابعيني على موقع مدرستنا التعليمي كل عام وحضراتكم جميعا بخير بمناسبة حلول شهر رمضان الكريم ،موضوع النهاردة مش عشان ازاى تذاكر في رمضان ، لكن عشان ازاى تذاكر اكتر في شهر رمضان.
 |
| المذاكرة في شهر رمضان |
في ناس كتيرة جدا بتشوف ان شهر رمضان عقبة كبيرة قدام المذاكرة وانه مايبعرفش يذاكر في رمضان وانه هو اما صايم ومصدع او واكل وعنده تخمه ومش قادر يركز في اى حاجة ، ان شاء الله في موضوع النهاردة هنحاول نبسطلكم طريقتين للمذاكرة في رمضان.
خلينا الاول نوضح نقطتين مهمين ، النقطة الاولى اني كنت طالب زيكم في يوم م الايام وبرضة كنت في ثانوية عامة وكان عندي رمضان زيكم، وخلينا متفقين ان رمضاني غير رمضانك غير رمضان اى حد ، اقصد بالكلام ده ان رمضانك بيكون زى مانت عاوزه.
يعني فيه ناس بتبص لرمضان على انه فرصة للعبادة او فرصه انه يخس او فرصه انه ينجز اكتر ..الخ، وفيه ناس تانيه شايفه رمضان على انه عبىء وحرمان من الاكل والشرب وانه تعب ومشقة وصداع وعدم تركيز وعدم انجاز ..الخ ، عاوز اقول ان شهر رمضان واحد ولكن انت شايفه ازاى؟ فرصة ولا عبئ؟
اهم حاجتين للمذاكرة
في مبدأين مهمين جدا في المذاكرة، أول مبدأ هو المكان، يعني لازم المكان يكون هادي وتكون الإضاءة كويسة، ويكون مهيأ للمذاكرة كده، ومرتب بحيث إن إنت لما تيجي تقعد تذاكر على طول مش لازم كل مرة تروحو ترتبوا عشان ما تضيعش وقت كتير في الكلام ده، المبدأ الثاني هو الوقت لازم تذاكر في وقت هادئ فيه سكون، وكمان تكون مركز وفايق فيه.بالنسبة للمكان فمعندناش مشكلة فيه، يعني المكان اللى بتذاكر فيه قبل رمضان هو المكان اللى هتذاكر فيه في رمضان، رمضان مش هيأثر علينا في حاجة زي دي، لكن رمضان بيأثر علينا في الوقت أيا كان البرنامج أو الروتين بتاعك في المذاكرة، ده لو عندك يعني روتين المذاكرة ! فهو كده كده هيتغير في رمضان، ولو معندكش برنامج أو روتين فدي فرصة كويسة إنك تبدأ يكون عندك برنامج أو روتين في رمضان، لأن رمضان هيساعدك على كده تمام؟
تعالى بقي اقولك على اهم نموذجين للمذاكرة في رمضان هيفرقوا معاك جدا وهتدعيلي لما تركز وتفهم انا عاوز اقول ايه ، وانا شخصيا كنت بطبق واحد فيهم لما كنت طالب زى حضرتك وكان فارق معايا جدا في الثانوية العامة وفضلت شغال عليه في كل رمضان وحتى بعد رمضان وهما نموذج بعد التراويح ونموذج بعد الفجر، وهنا لو سمحت هات ورقة وقلم واكتب معايا.
نموذج بعد التراويح
التراويح في الغالب بتخلص على الساعة 10:30. أو عشرة أو 11 حسب المسجد إللي إنت بتصلي فيه، فمن بعد التراويح لحد الفجر بيكون عندك حوالي 4 ساعات من 10:30 ل 2:30، فإنت عندك 4 ساعات، طبعا مش هنتكلم بقى إزاي تذاكر والكلام ده لإن كنا اتكلمنا عن الموضوع ده هنا.إحنا كده عندنا 4 ساعات تقدر تستغلهم في المذاكرة. بعد ما تخلص مذاكرة بتتسحر وتروح تصلي؟ الفجر و تيجي؟ تنام لحد الساعة 10:00 الصبح من الساعة 4:00 تقريبا لحد الساعة 10:00، ففي 6 ساعات نوم دول كويسين جدا دلوقتي، ولو دول مش كافيين ليك فمفيش مشكلة إنك تخليك نايم لحد الظهر وتقوم عندك من الضهر لحد العصر تقدر تستغل الوقت ده في المذاكرة.
وانا شخصيا مبرجحش إنك تكمل مذاكرة من بعد العصر للمغرب لأن الوقت ده هو الوقت إللي بيزيد فيه الجوع والعطش أوي، وكمان التركيز بيقل بشكل كبير وبتكون عايز تنام، والكلام ده ، فبرجح إن إنت تروح تقضيه في المسجد، يعني تتعبد بقى تقرأ قرآنك وأذكارك والكلام ده كله، وبعدين المغرب هيأذن تصلي وتفطر، وبعدين تصلي العشا والتراويح وتعيد الموضوع من تاني.
نموذج بعد الفجر
نيجي بقى للنموذج الثاني إللي هو بعد الفجر، فانت بتتسحر عادي جدا وتروح تصلي الفجر وتيجي تبدأ مذاكرة من الساعة 4:00 لحد الضهر يعني 8 ساعات. طبعا مش في نفس واحد، فمن الساعة 4:00 احد الساعة 12:00، إنت كده خلصت إللي عليك متذاكرش ثاني، يعني شكرا كده إنت يا باشا وعداك العيب وأزح.بعد ما نخلص مذاكرة. هتروح تصلي الظهر وتيجي تنام من الضهر لحد العصر. 3 ساعات وتقوم ومهم قوي إنك تقوم بعد العصر، أنا عارف إن النوم بيبقى حلو جدا ، بس مهم قوي إن إنك متكملش نوم لحد المغرب ضروري تقوم العصر، و من العصر للمغرب قضيه في المسجد، في قراءة القرآن والتعبد والأذكار.
لحد ما المغرب يأذن تروح تفطر وتصلي العشا والتراويح وتيجي تنام على طول. يعني فكرة إن إنت متكملش نوم لحد المغرب، علشان لما تيجي تنام بعد التراويح يعني مايبقاش عندك مشكلة، لأنك لو نمت لحد المغرب هتيجي تنام بعد التراويح فمش هيجيلك نوم، وهتكمل لحد الفجر و هتطبق فالدنيا كلها تبوظ معاك.
فمهم من العصر للمغرب تكون صاحي تمام؟ علشان لما تيجي تنام بعد التراويح يجيلك نوم أو تنام بسهولة وبسرعة، فتنام من بعد التراويح الساعة 10:30 لحد السحور إللي هي الساعة 2:30 فحضرتك كده نمت 4 ساعات؟ يعني إنت اخدت من الظهر للعصر. 3 ساعات ومن بعد التراويح لوقت السحور 4 ساعات يعني نمت 7 ساعات، أي نعم متفرقين بس حلوين.
الخلاصة
بصراحة أنا بفضل الطريقة دي جدا عن الطريقة بعد التراويح لأن أنا جربت المذاكرة في الوقت دا وقت بعد الفجر فعلا ده وقت غري بجدا إنت بتكون دماغك رايقة و الحاجات المعقدة بتبان قدامك بسيطة جدا ومحلولة ،كمان في نقطة غاية في الأهمية وهي إنك هتكون صاحي ومركز من الساعة 9:00 صباحا لحد الساعة 12:00، وده ميعاد الامتحان.
وبالتالي انت بتعود نفسك إنك تكون مركز في الفترة دي، الفترة دي دماغك شغال طول الشهر أنت معود نفسك إن إنت في الثلاث ساعات دول مركز ودماغك شغال وبتنجز وبتحل، فبالتالي لما تروح الإمتحان الموضوع بالنسبة لك هيبقى سهل جدا وهيبقى أبسط بكثير وأسهل بكثير من واحد مطبق أو نومه مش منتظم فدي فايدة كبيرة جدا بالنسبة لك.
اتمني يكون موضوع النهارة عجبكم واشوفكم قريب في موضوع تاني
لا تنسونا من صالح دعواتكم