الحل السحري للمذاكرة
 |
| الحل السحري للمذاكرة بطريقة صحيحة في وسط زحمة الدروس |
الحل الأول
تعلم نفس المعلومة بطرق مختلفة، فيه بحث للدكتور جيوش في 2008 بيقول إن التنوع في وسائل التلقي بيحفز أماكن جديدة في المخ، وأماكن أكثر في المخ بيساوي، فهم أسرع و احتفاظ بالمعلومة لمدة أطول.
تقريبا ده إللي إنت عايزة صح؟ طيب سؤال إزاي أنوع في وسائل التلقي؟ ممكن تعمل كذا حاجة؟ ذاكر من كتاب، ذاكر من ملخصات عاملها وذاكر من المصادر الثانية على النت اشرح الموضوع لشخص ثاني؟ حل أسئلة عن الموضوع.
طبعا مش هتقدر تعمل كل الكلام ده في مرة واحدة في نفس اليوم. لأ كل مرة تذاكر الموضوع المعين دا ذاكره بشكل مختلف عن المرة إللي فاتت، جرب الطريقة دي وهتفيدك جدا إن شاء الله.
الحل الثاني
ذاكر أكثر من مادة كل يوم، في بحث للدكتور رونلدي سنة 2012 بيقول عقلك بيعمل بكفاءة أكثر إذا ذاكرت مواد متعددة في نفس اليوم، في الحالة دي عقلك بيعمل بشكل أفضل بكثير من إنك تغوص في أعماق مادة واحدة و تركز عليها.
على سبيل المثال لو إنت مخصص النهاردة ساعة ونص للمذاكرة، لو ذاكرت في الساعة ونص دول ثلاث مواد كل مادة نص ساعة حتكتشف إنك بتفهم وبتفتكر أحسن بكتير من إنك تقضي الساعة ونص كلها في مادة وحدة. ليه؟
لأن احتمالية إن المعلومات المتشابهة في مادة وحدة تدخل في بعضها، الاحتمالية دي بتزيد، لو ركزت جهدك كله في مادة وحدة، إنت أكيد مريت بالموضوع ده، ونسيت كتير وعارف من غير ما تقول.
الحل التالت
صاحب بالين كداب، الكلمة دي بنقولها في مصر للي بيعمل حاجتين في نفس الوقت، كل الأبحاث أكدت إنه تعدد المهام إللي بتعملها في نفس الوقت بيجعلك أقل إنتاجية، مش بس كده. وكمان أكثر تشتتا.
مش بس كده، الدراسات كمان بتأكد حاجة طريفة شوية، الناس إللي بتدعي إنها تقدر تركز في أكثر من حاجة في نفس الوقت، في الحقيقة هما مش أفضل في الحكاية دي من الشخص العادي والطلاب الناجحين مابيركزوش في حاجتين في نفس الوقت ،اقفل موبايلك متردش على الرسايل، أقعد في مكان هادي، وخلي مكان مذاكرتك مرتب جدا ،ده ضروري جدا ليك.
الحل الرابع
اختصر، ودي بنستخدمها لما بنعوز نفتكر كمية ضخمة من المعلومات ، لما تعوز مثلا تفتكر بالترتيب خطوات معينة لتجربة أو أحداث معينة تاريخية بالترتيب أو أي حاجة تانية مشابهة، الحاجات دي بتاخد منك وقت ومجهود كبير وفي الآخر برضه بتكتشف إن في حاجة، لازم هتلخبطكك.
طب الحل إيه؟ الحل إنك تعملها اختصارات وتحفظ بيها، طب إزاي؟ تعالو نشوف أنا مثلا بذاكر فيزياء وعاوز أفتكر خطوات تجربة معينة، وليكن على سبيل المثال الغير دقيق بتقول الآتي:-
1-ضع بوصله بجوار سلك ملفوف.2-وصل السلك بتيار كهربي متردد.
3-استخدم قاعدة فلمنج لليد اليسرى.
طبعا ده مثال بس، طيب دلوقتي هعمل إيه؟ عشان أفتكر ثلاث خطوات دول؟هاخذ أول حرف من كل خطوة من دول وأكون بيهم كلمة هاخذ حرف الضاد من الخطوة الأولى و الواو من الخطوة الثانية والهمزة من الخطوة الثالثة، ويبقى عندي كلمة ضوء.هحفظ بس الكلمة دي وهبقى عارف إن الضاد بتاعة ضع كذا كذا، والواو بتاعة وصل كذا كذا، الألف بتاعت الخطوة الثالثة.
تخيل بقى لو عندك 20 خطوة وعاوز تحفظهم، وإنت جايب أول حرف من كل خطوة من دول وعاملهم في كلمتين، وافتكرت الكلمتين دول بس قد إيه الوقت والمجهود إللي وفرتهم ؟جرب الطريقة دي مش هتندم إن شاء الله.
الحل الخامس
اكتب مخاوفك ،هل هقدر أحل كويس؟ هعمل إيه لو دخلت الامتحان لقيت نفسي ناسي حاجات كثير؟ لو الامتحان طلع أصعب من المتوقع هعمل إيه؟ وغيره وغيره وغيره، أكيد في أسئلة كثير من النوع ده بتيجي في ذهنك باستمرار ده طبيعي.
ولكن الأفكار دي لو تعدت حدودها بتسببلك مشاكل تانية كتير، بعد كده، إيه الحل؟ بص يا سيدي باحثين في جامعة شيكاغو اكتشفوا إن الطلاب إللي أمضوا 10 دقايق في كتابة مخاوفهم قبل الإمتحان كان أدائهم وقت الامتحان أفضل بكثير من الطلاب إللي ماكتبوش مخوفهم.
علماء النفس بيقولوا الكتابة التعبيرية بتحسن الذاكرة والأداء بشكل عام، لأنها بتوجد متنفس للأفكار والمشاعر السلبية، فتقوم المشاعر السلبية دي ما تتراكمش و تسببلك مشاكل. بعد كده عشان كده لازم تكتب مخاوفك.
الحل السادس
اختبر نفسك دوريا، الأبحاث على مر السنين أثبتت إن اختبار النفس ضروري جدا إذا كنت تريد تحسين أدائك الأكاديمي، فيه تجربة لبروفيسور في علم النفس كان بيدرس مجموعة من الطلاب وقسمهم لفريقين ،فريق منهم أجبرهم على حل اختبار من ست أسئلة بعد كل درس وفريق تاني بعد الدرس مادلوش أي اختبار.
اكتشف بعد كده إن في إمتحان الميد ترم الفريق إللي كان بيحل اختبارات بعد كل درس كان أداؤه أقوى بمراحل من الفريق إللي كان بياخد الدرس ويروح، ولذلك ما تذاكرش، وبس كده. لأ خصص وقت من مذاكرتك لاختبار نفسك وشوف هتتفاجئ إزاي.
الحل السابع
اقرأ بصوت مرتفع كل الدراسات بتشير إلى إن القراءة بصوت مرتفع بتساعد على إسراع في عملية التعلم ليه؟ لأن ببساطة المعلومة بتدخل بطريقتين مرة بالسماع ومرة بالنظر. إنما لما تقرأ بصوت واطي أو بعينك بس المعلومة بتدخل بطريقة واحدة فقط إللي هي النظر،وإذا كانت القراءة بصوت مرتفع لفترة طويلة بترهقك على الأقل اقرأ النقاط المهمة أو الرئيسية بصوت عالي.
الحل الثامن
خط فاصل ،أخذ الفواصل بانتظام بيعزز الإنتاجية ويزيد التركيز وبناء عليه مش فكرة كويسة أبدا إنك تحبس نفسك في اوضتك وتقعد هناك كام ساعة عمال تذاكر، تذاكر تذاكر، ده غلط.
ممكن بعد الكام ساعة دول يجيلك إحساس إن إنت أنجزت، ولكن ده عكس الكلام، العلم بيثبته إن مانجزتش . خد على الأقل من خمسة لعشر دقايق راحة كل 40 دقيقة مذاكرة، وخلي بالك وقت راحة ولا تستعمل تليفون ولا تستعمل كمبيوتر. ليه؟ لأنهم هيمنعو عقلك من أخذ الراحة الكافية.
الحل التاسع
وده هيعجبك شوية، كافئ نفسك بعد كل جلسة مذاكرة في بحث معمول في 2006 بيقول لك إيه إنت لو حددت لنفسك إيه هي المكافأة قبل أصلا ما تبدأ المذاكرة، إنت لا إراديا بتحفز عقلك على التعلم، وحتلاقي هنا أن تكون المعلومة بقى بتم بشكل أسرع ،المكافأة قد تكون أي شيء بسيط بتحبه، أي شيء مهما كان صغير هينفع؟ المهم تكون إنت بتحب تعمله.
الحل العاشر
العقل السليم في الجسم، مش محتاج أثبت لك بتجارب قد إيه الاهتمام بصحتك بيأثر على قدرتك العقلية، لازم شرب سوائل كافية وتنام بشكل كافي، و تعمل تمارين على الأقل ثلاث مرات أسبوعيا، الكلام ده مش حشو، الكلام ده تأثير خطير على قوة التذكر.
الحل الحادي عشر
المطبخ ، في مركب كيميائي فيتامين من أهم الفيتامينات المفيدة للمخ بشكل مهول اسمه كولن المركب ده ملوش حل، بيساعد المخ على تكوين ذكريات جديدة و بيحفزه بشكل خرافي، تقدر تبحث عنه بنفسك وتعرف فوايده الكثير.
المركب ده مفيش غنى لأي طالب عنه، المركب ده لو قلت لك إن العلبة منه ب100 جنيه أنا واثق إنك هتشتريه، طيب لو قلت لك إن المركب ده متوفر في أكل كتير حواليك؟ تفرح؟ طبعا تفرح.
فيه أطعمة غنية بالكولين من أهمها على الإطلاق الفراخ والبيض، صفار البيض فيه حوالي 90% من حجم الكولين في البيضة كلها، طب لو إنت نباتي؟ متقلقش عاملين حسابك العدس، البروكلي، لب عباد الشمس كلهم فيهم نفس الفيتامينات.
الخلاصة
قدمتلك11 حل، وقلت لك في نهاية المقالة هقولك على حكمة مهمة تعمل بها، الحكمة دي عبارة عن سؤال وإجابة، السؤال بيقول :إزاي تاكل فيل؟ تعرف الإجابة؟ عضة كل مرة، كل مرة أطمة أطمة في أطمة.
أيا كان المشوار إللي قدامك، أيا كان حجم المعلومات المفروض تعرفها أيا كانت صعوبة المادة، أطمة في اطمة هتخلص، وافتكر دايما لو في أي حد في الدنيا يقدر إنت كمان تقدر. بس يا سيدي مطولش عليك بقى، أتمنى تكون طلعت بأي معلومة مفيدة من المقالة، ولو حصل شاركها مع غيرك.